الرئيسية / الزجل / من روائع رضوان أفندي : قصيدة عيد الميلاد

من روائع رضوان أفندي : قصيدة عيد الميلاد

نهار ولدتني امّي
گالت ليا سير برزط الدنيا
ما ذبحت خروف ما جاتها هدية
لبّستني شورط وقميجة عكرية
وطلقتني فـ زناقي المدينة
نزلت عند الناس والحجر في يدي
القيت الناس ذهب وتبن
الشهادة و الكفن
هوما سلاحك آ ولدي
سير ورجع عندي
نورّيك عدوك فين يتخزن
لقيت البرارك عامرة دم
والمحاكم غارقة في الدم
والجوع في الجيعانين واصل حتى لعظم
الغيس والوسخ والظلمة
ولا سقف لا ضو لا ما
والرعد والبرق والبوليس خيط من السما
وتعلمت قاعدة خايبة
نفيّق الناس قبل الفجر
ونگول ليهم الدنيا سايبة
جيبوا العصي وضربوا الليمون
را عرصتكم طايبة
حرّشاتني امّي على السماسرية واصحاب الشركات
وگالت لي : هنا فين ابّاك مات ،
قتلوه كروش الحرام بالجوع وهزان الثقل .
وحلفت أنا وحق الزلط والعرا
وحق الجوع والحگرة
ما نخلّي حق ابّا يضيع
ما نطلب ما نطيع
نفكرهم إلا نساوا
بالحجر بالظفر
بالسنان بالعضّان
بالقرطاس إلا بغاوا
ودازت الايام تجرّ
البوليس يجر
الزمان يجر
ولقيت راسي نقطة فـ بحر
هانا فـ الاوراق كنبرّد الحر
هانا بلا خبز بلا كسوة بلا صباط
كنتسنى نتعرّف على شي جيعان
كنتسنى نتعرف على شي برزاط

شاهد أيضاً

شْمِيسَة وَ اسْنِينَةؤُ كَذْبَةْ الغْزَالْ /حكيم البورشدي

شْمِيسَة وَ اسْنِينَة ؤُ كَذْبَةْ الغْزَالْ   مَكْتُوبْ عْلِيَّ نَعْبَدْ الشَّمْسْ بَزْ مَنِّي يْبَاتْ شُومْهَا …

البوح….الزهري /حسن بنموسى

البوح….الزهري   عسل البوح وشوق البتول وطنين حماقاتنا الأولى ولكنة من شفتيك تجنح بأحلا مي …

هل أعجبك ما قرأت ؟!

%d مدونون معجبون بهذه: