الرئيسية / الزجل / طريق الضحكة من ديوان لامة الحروف الزجال عبدو سلطان گاسمي

طريق الضحكة من ديوان لامة الحروف الزجال عبدو سلطان گاسمي

قصيدة طريق الضحكة
 
وليت نشك ف شكي
وشكي عاد
يشك ف شكو
يوم شافتك
ودني العمية
بمومو الگروج
مضات شوك الرمش
وطاحت عيني
على عين گفاها
بدوخة المحبة
بقا راسها يدور…
 
صار الهوى يتنخوى
وصار البغو يعرف
طريق الضحكة
طريقها غير طريقي
وسرت انغير…مل القلم
من نهار شفتو
يكتب عليك اقصايد
ورا ظهري
دون شواري
دون خبري
وقتما رشقات ليه
يسرسب الكلام
بلا هواه يتمختر
بمدادو مغرور…!
 
وكلما زف
شيطان الكلام وتسلط
يبوح بقصيدة
تارة يعف
تارة يتلف
حتى القريحة
بنت الجواد
مرة شاعلة عواد
مرة طافية رماد
خطرة تجود
خطرة تنهزر
ويا لطيييف
مللي تغوبش
وتعطي بالظهر
يعود الخاطر مكسور…
 
انت ف الطايلة زاهي
وانا ف الماضي ساهي
موضر راسي
نسيتو عندك
هدمتي ساسي
بنيتي حيطك
والشوق اغلب
مللي احبيت
على كفوف الگلب
وعزلاتك يدي العرجة
حطاتك ف البال
ؤف حبال الخيال
خلاتني منشور…
 
انوضي احلامي
بحليب الصبر
علا وعسى
تصلي ركيعات الاستخارة
ومن كثرة المعزة
تدعي بالملاقية
تا من لعيا اللي كان
صابر ومصبرني
طلب مني الشرع
شفت حتى عييت
ورمشت عيني
ما لقيت غير الدموع…
نزلتني ف طريق محدور…!
 
كل دقيقة
نعيشها بطيفك
بسيرتك.بصورتك.بحروفك
وكل ساعة
نعيشها بنهار
يقتلني الشوق
نعيش مخنوق
تا-كيف نتوحشك؟
وانت گدامي غادي جاي
واش تسوى حياة الموت؟
يلا كنت نتسارا
ف مدينة خيالك
غريب مقهور…!
 
انت شميشة
كاشفة سري المفضوح
انت نجيمة
مخيطة تنهادي المجروح
انت گمرة
ضوات بيت الروح
ف سحاب الرحمة
ولليت مگروح
وغمال التفكير
ما نفعاتو خزامة
ما نفعو كافور…
 
شحال من راس
يفكر فيك أراسي !؟
وشحال من شطنة هي
مزيرة سلوك المخ !؟
ياك انت راسي وانا مولاك
علاش تخلليني
ضاير.تاير.حاير ؟
وتغلب اطبايعك
على طبعي
عندك زايد ناقص
فحال-فحال
حتى تساوي
مابقات ساوية عندك والو
وتكركيب حسابك
حاسبو مجرور…!
 
جيت…نتفكرني
يوم نسيتني
جيت…نواسيني
ونسقيني بشويفة مسروقة
نحطني ف طبلة مجاجك
نربعني رجيلة
فوق رجيلة
نشعلني بكبريت اشواقك
نكميني بدخان احلامك
نشربني قهيوة
معصرة مگطرة معطرة
منسمة بقرفة
الوقت الماجي
وخايف الزمان
عليا يدور…
 
فيك…تتنزه
عيني البكمة
فيك…تفوج
گانتي الصمكة
فيك…يتبسم
الخاطر الغابر
والگلب العامر
بين حيرتي نتشرش
نتخبط.نتخرط.نتسرهط
ف غيابك تكون قريب
بلا شوفة بلا ميعاد
ؤف قربك انصير ابصير
ما جابر گواد
امكمد ف الركنة مضرور…!
 
ارخف…
ارخف على الگلب المنتوف
ارخف…
وبرد الجوف الملهوف
الزعطة…سيوانة
طايرة ف سماها
الزعطة…شيطانة
دقة-دقة لاعباها
الزعطة…سليعفانة
مدوخة من قراها
ضلعة عوجة
هرستها ف يديا
صگوعية الولف…
وصخط ليام والشهور…!
 
لاقي المحبة
ف لامة الحروف
نسگيو قصرية الكلام
كلا يلگم كليمة
را طريق الضحكة
طالقة السالف
فيها تايه زاعف
موضر.تالف
واقف.خايف
ما عارف
منين ندخل
ولا منين نخرج
ما موالف
بهضرة البور…
 
الكتبة…سبوع الورقة
زررها بالحكمة
انبايع للكلمة
الواقفة حلمة
ف غرق المنام
فتلني الغرام
فتيل فتات الشطبة
ودخلني دخلة
بلا خروج
دخول فتنة
هاجمة بلا شرع
ف زمان الباطل
بكيني بدموع الفرحة
مسحها بحرير خدودك
وساوي…
ساوي وترات
الگلب المعگور…!
 
من ديوان لامة الحروف
الزجال عبدو سلطان گاسمي

شاهد أيضاً

شْمِيسَة وَ اسْنِينَةؤُ كَذْبَةْ الغْزَالْ /حكيم البورشدي

شْمِيسَة وَ اسْنِينَة ؤُ كَذْبَةْ الغْزَالْ   مَكْتُوبْ عْلِيَّ نَعْبَدْ الشَّمْسْ بَزْ مَنِّي يْبَاتْ شُومْهَا …

البوح….الزهري /حسن بنموسى

البوح….الزهري   عسل البوح وشوق البتول وطنين حماقاتنا الأولى ولكنة من شفتيك تجنح بأحلا مي …

هل أعجبك ما قرأت ؟!

%d مدونون معجبون بهذه: