الرئيسية / عامي / رسالة من داخل المعتقل – أمن الدولة – الشاعر أمين الديب

رسالة من داخل المعتقل – أمن الدولة – الشاعر أمين الديب

رسالة من داخل المعتقل
أمين الديب

قول يا عم الشيخ أمين

قول لكل المظلومين
ماتخافوش الصبر طيب القضاة ناس طيبين
المحاكم هي هي .. العادية وعسكرية
لو يلفق 100 قضية .. إنتوا برضو المنصورين


يا مخوفين الناس بخوفكم وعجزكم
ياللي البوليس والمعتقل لغة التحاور عندكم
ومكممين كل الشفاه بالبلطجة
والأمن يحمي أمنكم
هسأل سؤال من فضلكم .. ؟
جيبينا ليه للإعتقال .. ؟
رغم إننا طول عمرنا
قدام عنيكم من زمان
وبترصدوا كل اللي بيدور ف الخيال
وبترصدوا كل اللي موجود ف البيوت
حتى اللعب بتوع العيال
وألف مرة بنتحبس
وبتسألوا مليون سؤال
وبتعرفوا مطرح دبيب النمل فوق سطح الجبال
وأحلف يمين .. فيه منكوا ناس متأكدين
بالذات كبير البصاصين
أموالنا جت جهد وعرق وفلوسنا م المال الحلال
ولاعمرها كانت منح
ولا عمرها كانت غسيل أموال
ولافينا خاين أو جاسوس
ولاخدنا قرض من البنوك
وهربنا ومعانا الفلوس
ولاكنا تجار ممنوعات
ولا بعنا مرة مخدرات
ولامن بتوع العبارات
ولا من بتوع الرقاصات
وطبعنا غير طبعكم
وصحيح نخالف رأيكم
لكننا مش ضدكم

فإزاى وليه وف شرع مين .. ؟
جواسيس وممدوح إسماعين
يتحدوا مدنيين .. ؟
القاضي حاكم عسكري
ونقول لمين ونعيد لمين
سيبنها بس لربنا
وربنا ع المفتري
وإن حد مات أو حد عاش
ميهمناش
أهم شئ الشعب يعرف سكته
يعرف عدوه ومين بينهب ثروته
وتبان عزيمته وهمته
وساعتها يفرض كلمته
ويقولها بصراحة
من غير كسوف ولا خوف
والنفس مرتاحة
ومش عشان أكل عيشنا ننسى عقيدتنا
ده الرزق من ربنا .. موجود ف زرعتنا
واللي في عمل يتقنه .. من أجل أمتنا
ومنشحتوش أكلنا من إيد عدوتنا
ملعون أبو اللقمة لو تنزل بكرامتنا
ملعون أبوه الرغيف لو ذل عزتنا
ملعون أبوه الدولار لو جه بذل وعار
ملعون أبوه اللي يستسلم للإستعمار
ملعون أبوها الحياة لو سجن للأحرار
والموت ولا العار
ولا الأنجاس تدوس بتنا
جسم العرب قطعوه بقي 300 حتة
والراس بقت وحدها .. مفصولة م الجتة
لاودان بتسمع .. ولابتشم نتانتها
ولسانها مشلول ولابتنطقش كلمتها
ولاعينها بتشوف طشاش ولا شايفة سكتها
فرحانة إكمنها مسنودة عالية لفوق
يا خلق فوقوا بقى
وقولوها لجل يفوق
الراس متنفعش أبدا لو بدون جتة
ياريت تفوقوا بقى قبل الأوان مايفوت
عورتكوا بانت وسقط كل ورق التوت
قلناها ومداوية من جوة بطن الحوت
يا مكتفين الشعوب بالقسوة والجبروت
يا مشتتين المطر كل الشجر بيموت
ملعون أبوه السكوت .. الشعب خاب ظنه
ملعون أبوه السكوت .. متفكروش إنه ..
لامؤاخذة خوف منكم
أو من ظلام سجنكم
الضير عرف خنه
وإن كان على المعتقل
ميهمناش منه
صدق اللي قال ف المثل
اللي إختشوا ماتوا
وإن أى حاكم ظلم
فيه رب فوق منه


 

الشاعر أمين الديب – أمن الدولة

شاهد أيضاً

عبدالرزاق الأشقر

الشوق في أعتى لواعجه – عبدالرزاق الأشقر

  قدْ غادرُونا قبيلَ الفجرِ و انطلقُوا لتستفيقَ على وقعِ الخطا الطُّرقُ غابُوا عنِ العينِ …

بستان نابل – نزهة المثلوثي

حنيني إلى البستان سلَّط بأسه نوى قلمي شوقا علي يجور * تطلَّعَ للنارنج قبل عَشيّة …

هل أعجبك ما قرأت ؟!

%d مدونون معجبون بهذه: