الرئيسية / الزجل / نتا… جينا وسط غابة مروان بنجا من الشباب الفائز في المسابقة

نتا… جينا وسط غابة مروان بنجا من الشباب الفائز في المسابقة

نتا…
جينا وسط غابة
الطٌل باليل
والصباح ضبابة
هنا ولهيه غنا الحطابة
وشي قلام مرشوڭة فالذات
شواقر عطابة
منا غير حلمة في كف السما
فوق جناح لهوى طاير
ووبارود الوقت وزناد لغدر عليا عساس
مانا غير عريش الصبر مسقي فحبق الناس
وخا شوفتي فيك قليلة
وخا تبسيمتي ليك هبيلة
راه لعقل عاقل ملي كنتي سيدي
ملي شفت وحضرت وبنيتك بيدي
قبل متتحول احلامي فيك لسراب
قبل متتبدل فيك الشوفة
سيفت غراب
وقبل متكون نتا هو نتا
كون نتا السبع وخليني انا لغزال
كسب نتا لعقل وسقيني انا لهبال
ملي غبتي عليا
شفتك فعيني هلال
كنتي خابية
وجيتك عطش عمى
كنتي أزمة
وجيتك هبة من السما
وكنت مخبي فڭلب ڭلبي شلا احلام
كنت نخاف عليك من صهد نار الذنوب
ڭلت ياك لحديد ويذوب
ونتا لا
نتا صحرا ورموشك نخلات
نتا سما وضحكاتك غيمات
حلو باب السما
وطاح الما
على الجبل
والجمل وما جمًل
نتا دمعة فخد العزبات
لمن حر الخوف ولدات بلا وقت
والوقت وقات
ظهر وعصر
مغرب وعشا
ونتا لعشية ملي تعاشات
كون كان فيك لخير
كون هللتي لودان الصباح
كون كان فيك لخير متخليك لوقت يردنا رجلين بلا راس
كون كان فيك لخير
متخليس دمعنا يمساس
وتبقى نتا هو نتا
علينا عساس
علينا عساس
 
– مروان بنجا –

شاهد أيضاً

محمد رمضان الجبورمحمد رمضان الجبور

ثنائيات السرد في رواية (شَمتو) للروائي مصطفى القرنة – بقلم الناقد / محمد رمضان الجبور / الأردن 

         الحرية ، العبودية ، الاستعمار ، التحرر ، الاستبداد، الظلم …..مفردات استفزت الكاتب والروائي …

خطيئة  الظل  باكورة أعمال  الشاعرة أماني مبارك

  ************************************ صدر عن دار المعتز للنّشر والتّوزيع لعام2020  الديوان الأوّل للشاعرة أماني المُبارك  بعنوان …

هل أعجبك ما قرأت ؟!

%d مدونون معجبون بهذه: