الرئيسية / الزجل / الموسم :زجل ابتسام كمال

الموسم :زجل ابتسام كمال

الموسم

هزيت السدا ،هزيت الخلالة

بغيت نوقف المنجج ننسج زرابي هبالة

لوانها موردة و زينة الفصالة

تباع فالعز ماشي فالدلالة

وجدت الصواني و الكسكس يفور للخيالة

عندنا موسم،عندنا جمع فيقو الصغير

دقوا الخيام علموا نساها و حضروا رجالا

وقفوا القياطن   خلييو الكوانن شعالا

جودو على الغادي و الجاي راه الجود عندنا سلالة

ورتناه من العم للخالة

مجمعنا مجمع الخير و لخير لينا يتعالا

موسمنا قمناه باش يعرفوا الغيار بللي بلادنا بولادها فرحانة

نحمدوا ربي اللي من فضلو عطانا

الشاب ييدع،يخدم،واعي و عارف الخيبة من المزيانة

و قاد يهد الجبال فوجه من عدانا

و اللي مزهي المجمع “النسا” بلا بيهم النور ينسانا

ها الشمالية  ترحب بالعيل و تبسيمتها تفوح منها رياح لحب كيف البلعمانة

يا العايلة حني علينا شوية راكي سكرتي هوانا

بنت الصحراء هنا!

جيبوا الورد جيبوا الخزامى

الصحراوية تعمر الخيام قدامها ربح و تزيد سر البلاد متانة

و الريفية يا لالة قولي نعام

تستاهلي من عندنا غير مرحبا و زيد للقدام

واللي تاه فسماها ما يتلام

مرحبا مرحبا تاكوماتينوهاهما جاو الشلحات

الزين و التباتة منهم جات

و مننساوش نسا دكالة و الشاويات

ماليات الخير و الحداكة منهم نبعات

اوا يا بنات بلادي را بلادي بيكم زهات

يلاه نبداو الموسم و التبوريدة و زغرتوا يا زغرتات

بلادي الحبيبة تاج وولادها فوق التاج ماس

طال الزمان و لا قصار التاج مقامو فوق الراس

خلي العديان فخبتهم غارقين راه الجوهر غالي عمرو يرخاص

ابتسام كمال

شاهد أيضاً

الأديبة فاطمة محمود سعدالله

الأديبة فاطمة محمود سعدالله

بين طياتِ الوميض ـــــــــ بيْن غَفْوةٍ وصداها …تمْتطي الأمْنياتُ ظهْرَ المسير .. ينْزلِقُ الأمسُ والآتي …

الشاعرة نزهة المثلوثي

الشاعرة نزهة المثلوثي

بستان نابل حنيني إلى البستان سلَّط بأسه نوى قلمي شوقا علي يجور * تطلَّعَ للنارنج …

هل أعجبك ما قرأت ؟!

%d مدونون معجبون بهذه: