الرئيسية / الزجل / مقاطع عشّاقية الخضير كريش

مقاطع عشّاقية الخضير كريش

مقاطع عشّاقية:

1_الكسدة سلب غزال

والخدود حمرة تفاح

شوفة فيك تشفي لرياح

واخا عيونك ذباحة

صدرك يداوي لجراح

وريقك يكَمَّدْ لكْراحة

2_الشعر حرير كبال

سمني من فمك فاح

ولحْياتي تَرْواح

الشَّفْكَة فيك راحة

فالمُكْ صورْتَك جيّاحة

لَهْفْتي لَغْرامَكْ واكْحَة

3_هي العطفة كافرة وحق الكتاب

تْدُقْ بالسّيف البابْ

طبها غلّاب

كذا من قلب من حر شوكْها معْطوبْ

شابْ بالنْحيبْ

4_ليَ نْسافَرْ فْعينيكْ

نلْكَا دْوايَ عنْدَكْ

نفسي ليك ارْتاحَتْ

يالالة العْناية بيك
نْحَنّي بتْرابْ قْدامَكْ

راهْ الحال ضْياقَتْ

يالالة انا بين يديكْ

غْواني زينْ حرْفَكْ

وفَتْياتي بيك جوادَتْ

5_جيني ياولفي ونْجيك

مَلَّحْ العشْقْ بْخَطْوَكْ

ايلا حْلاوتو مْساسَتْ

بين رْموشي نْخبّيك

بالشّوق نَسْقي ولْفَكْ

واحا الكبْدة قْساحَتْ

6_البارحْ

كانت الخَطَوَة مْرْخيَة

وكانت روحَكْ نْقيَة

وكانت الكبْدة سْخية

وكانت اللّمّة بالنية

وكنت وردة عْزيزة

وكان القلب مشْموم

7_كانت كمرة

والليل ربّى قلبو عْليها

دارها مومو

وبجْفون العين حاضيها

8_تْشَهّيتْ نْكون عْلامْ

فمَرسْذاتكْ دكَيني

حَيحي بيَ لَغْيار

تْشَهّيتْ نْكون سْلام

فكف يِدَكْ وَشْميني

تهْبى ديك لجْمارْ

9_رْموشْ عيْنيكْ سْواحَلْ

نتْفَجَّجْ عْلى ذوقي

غْرامَك لقْليبي عاكَلْ

رخَّفْ العكَدة معْشوقي

هَجْركْ كَبْ مْكاحَلْ
طرْطْكَتْ ما قَتْلَتْ شوقي

فْطيفَكْ نْباتْ نْغازَلْ

واشْ كَدْها تَمْسَحْ خْروقي

10_غْرامْها شرَّبْني من حرْ لَمْرارْ قْداحو

شلا بكيان وشلا نوح

حبْتو تنْغُلْ مْرَضْ القلب بانْ تقْياحو

نَتْرَنَّحْ كيفْ المَرْيوحْ

هْواها كان للقلْبْ قوتو وترْواحو

طبْ ودوى للروح

داريتْ رْوايحْ العشْقْ ومن حروفي فاحو

واشْ كَدْها تَتْدارى لَقْروحْ

11_بعْدْ ما كَلْتْ عْطاتْني بالصَّدْ

وفيَ كَداتْ نارْ عوافيها

رجْعَتْ تْحُكْ دبْرَتْ عَشْقي بالعَنْدْ

هي العطْفة دكَّتْ كيفْ نْداريها

12_طاحَتْ دْموعْها عَ الخَدْ

شكَّتْ ويدانْ وشْعابِيَ كبَّتْ فيه

شَعْلَتْ نيران الصْفا دْحاتْ الحكْدْ

جْذورْ العشْقْ بْصبْري نَرْويها

13_هْديتَك ذاتي محبَّة وشلّا جْوارَحْ

وكنْتِ نَجْمَة مْضَوْية فيها

بالخاطَرْ رْطابْ السيكي القاسحْ

نْبَتْ قَمْحو مْزَرَّضْ

وانتِ الخْزامى حايْطة بهْ

14_وحقْ العيْبْ المتْروكْ

وحقْ الحْديثْ المشْروكْ

وحق العيشة الدَّاحيها الحْرام

وحق نْسايْمْ الهْوى الحاجْبَة زينْ المْنام

وحقْ ماسْقيتيني منْ كيسان فايضة غْرام

ايلا انتِ بالذاتْ

السّاكنة هادْ الذاتْ….

 

 

 

 

شاهد أيضاً

تطبيق تحدي المعرفة حمله مجانًا

        يحوي التطبيق على 12 تصنيفا الأدب العربي اللغة العربية التاريخ صدر …

أم على قلوب أقفالها – محمد فتحي المقداد

  مع بداية انطلاق حياتي العمليّة في العام ١٩٨١، انقطعتُ عن الدراسة في الصفّ الحادي …

هل أعجبك ما قرأت ؟!

%d مدونون معجبون بهذه: