الرئيسية / الزجل / فَرق كْبيرْ مليكة فتح الإسلام

فَرق كْبيرْ مليكة فتح الإسلام

فَرق كْبيرْ

مليكة فتح الإسلام

 

فرق كبير بين كلمة أيَّّه

وبين كلمة لاَّ

بين واحد غادي معاك بالصَّدق

وواحد إتخلَّى

فرق كبير بين هاد لَمْحلَّة

وديك لمحلَّة

بين بزَّاااااف الرجال

وبينك أ  عبد الله

فرق كبير

فرق كبير بين ماء

جاي في قادوس مصدِّي

 وبين مَّيْهَة لبير

بين لسان دوَّاي …

ولسان غِ خانو التَّعبير

بين شربة من عوينة صااااافية

وبين تطسينة ف غدير

فرق كبير

فرق كبير بين وگفة ووگفة

بين تْبَنْضِيضة وعَطْية گْفَا

بين واحد يبكي لدموعك

وآخُر فرحان لعْرَاك

فرحان لجوعك

بين واحد يتمنَّى جْلاك

وآخُر يتسنَّى رجوعك

فرق كبير

فرق كبير بينك أ عبد الله

وبين بزَّاااف من شلَّى

من شلَّى گْنُوس

هيَّ بْقَات ف بُوسَان الرُّوسْ

ولاَّ شحال فجيبك دْلفلوس

الرُّجلة عندي أ عبد الله

الرجلة عندي أ عبد الله

ماشي حُلَّة …

الرُّجلة حاااال

حال ما لگيتوش ..

ف شْعَيبة …

ولا العربي …

ولا الزَّهواني

هيَّ سميَّات جابتها الوقت

وكْتبتها ف ديواني

لكن ما كتْبتنيش كيف كتبتيني

ونبَّتي حُب بوري ف فدَّاني

ما طمعتيش تكون قصيدة

يردَّدْها لساني

ما بغيتيش تكون برَيَّة

وتقصد عنواني

كُنتِ خايف لا تكون وردة

مجرَّد وردة ف جناني

ونسيتي باللِّي فرق كبير

فرق كبير بين ..

باللَّعمان والكرگاز

الگحوان …

الجَّمرة والغنباز

والورد البلدي دااااك الحُرّّْ

ما بغيتيش تكون بحر

نعُومك ساعة تهدا مواجك

ما بغيتيش تكون مَحْرك

قصايدي خيل ..وآنا عجاجك

ما قبلتتيش تكون جبل

ونتيه ففجاجك

ما رضَيْتيش تكون حبل

تربطني بيك …

تعگُد فيَّا وتفتل

خفتي يا عبد الله

خفتي نجيك طايعة

خفتي نقبل…

خفتي تهواني ما تقدر تنساني

خفتي توحل

خفتي يا عبد الله وما قبلتيش

ما قبلتيش نغير منَّك عليك

سْحَااااااااااكْ

نحُوزك ليَّا گبل لا تحوزني ليك

 

 

 

                                                                        مليكة فتح الإسلام

شاهد أيضاً

تطبيق تحدي المعرفة حمله مجانًا

        يحوي التطبيق على 12 تصنيفا الأدب العربي اللغة العربية التاريخ صدر …

أم على قلوب أقفالها – محمد فتحي المقداد

  مع بداية انطلاق حياتي العمليّة في العام ١٩٨١، انقطعتُ عن الدراسة في الصفّ الحادي …

هل أعجبك ما قرأت ؟!

%d مدونون معجبون بهذه: