الرئيسية / الزجل / من لبحر لهيه….عزيزمحمدبنسعد

من لبحر لهيه….عزيزمحمدبنسعد

 

من لبحر لهيه

18200_10203637286846623_4093463951270043206_n

 

نعست لمدينة

وبقاو الدراري فايقين

ومللي فاقت لمدينة

 لقات الدراري نعسو

بلآ عشا ، بلآ غطا

بلآ خدمة ، بلآ ردمة

بلآ وجه حق

بقا فيها الحال

شربت كينة لهلآل

ونعست.

 

الغد ليه

فاقت لمدينة

ولقات الدراري حركو.

 

كال اللول

أنا من هنا

مامحسوبش على لهيه

أنا كون لقيت هنا لهنا

آش هججني أنا لهيه.

 

مكواني .. مكواني

هاجرت وساد عتبة بلادي

وتوسدت عتبة بلآد البراني

وحياني الله

حتى شفت النصراني

قرا  ليا حساب

لكى ليا رقم وسماني

وخلآني نكسكس حداه

 ثلج ليالي حياني.

هو يحفن بيد وحدة

وانا نحفن بليدين بجوج

ياه.. مكساني.

 

سعداتهم بلادهم كاداهم

مسكياهم بمغرف وحدة

بعلآمات الفرح لاكياهم

كملقى لحبق لكل وردة.

 

كال الثاني

بلآدي كون كانت سما

نكتب بجاجها لزرق

سعداتك في كل صباح

تلبسي قشور

ويخرج ساكنك مبشور

سالم، غانم وفالت

بحال الى حتى حاجة

 عمرها ما كانت.

 

تمنيت نكون عجاج

بغيتو يحرك فيا لمجاج

ونهيج على وعدي وسعدي كلماج

 سفينة

 نبنيها بلوح الصفصاف

ومللي يهيج لبحرنلهيه

نغرق انا ، وتنجى الناس

يعزلو من بينهم رياس

يقطع بيهم

من لبحر لهيه.

 

وكال الفالت للثالث

ارجع آوا يا الغادي

لآ تفرط في عزيب

في الطريق آوا الجمر كادي

وانت فرادي غريب.

 

ضربو على هادي

يشد هادي

ما ضرني غ خلى

 لحصيدة بلآ كليب.

ويلا كتابلك

عمر جديد يا لغادي

كية شك الطرقان

 اللي تدي ما تجيب.

 

لمريرة جدمت بشوك وشطب

وجاك عراض الغابة

لعرس الذيب

مزرار  زندي ايلا ما دمر يعطب

وكية من تقلب عدانو نديب.

 

واعدني يا جرحي

 ونجيك في صفة أيوب

صابر وباكي ومغلوب

ويلا طاحت الدمعة مني

والله بز مني

هذا مقدر ومكتوب.

 

بلادنا يا بلادنا

دَرَّعْنَا خيش لمحاين بلا غراز

والشميطة كيادنا.

 

بلادنا يا بلادنا

كوليها وجمافو

الساكت ميت، شدالرصن

والزجال ميت، موسد مسن

وانت ماانت حي

ماانت ميت

زيد كولها وموت احسن.

 

الله الله يا بلادي

بكينا وحمل الوادي

ياك ع بدموعنا باش غادي.

 

الله الله يل بلادي

كون ما سر الواد

مايوكح البير

شكون هججكم يا ولادي

حتى بقات الركية

ع الغبرة ولعجاج يطير.

 

والله اصْغرْ حَجْرَة في مَكْرَطْنَا

كادَة ترْوي مَا كَانْ

وديكْ لَمْهَرْسَة في مْغَازَلْنَا

كَادَة تغزَلْ سْدَا وَكْفَنْ منْ الْكَتَّانْ

عْلى كَدْ الرْوَاحْ اللِّي طَاحُو

عْلى كَدْ الدَّمْعَاتْ اللِّي سَاحُو

عْلَى كَدْ اللْيَّالِي الِّلي  رَاحُو.

 

 

واكركر يا لحمام

رسام الدوار خلات

هز جناحك زيد الكدام

ايام الجريحة دخلات

وخرفو دوك النخلات.

 

شاهد أيضاً

تطبيق تحدي المعرفة حمله مجانًا

        يحوي التطبيق على 12 تصنيفا الأدب العربي اللغة العربية التاريخ صدر …

أم على قلوب أقفالها – محمد فتحي المقداد

  مع بداية انطلاق حياتي العمليّة في العام ١٩٨١، انقطعتُ عن الدراسة في الصفّ الحادي …

هل أعجبك ما قرأت ؟!

%d مدونون معجبون بهذه: