الرئيسية / الزجل / الڭراب / مصطفى دكي

الڭراب / مصطفى دكي

 

الڭراب

الوعد تسيف ليا من ثاني

كساني حيك مطروز ب لمعاني

مهموم ف كل واد تلڭاني

او فين ما نڭول نحل عڭدة

يتعڭد بيها لساني

و فين ما نجي نفرح

تبكي عيني من ثاني

ڭراب متعوس خانتني ليام معانداني

فوڭ ظهري جلد عتروس منحوس

رماتو لقدار ف احضاني

الكسدة طين والكسوة حمرة

ولعروق خضرين ونحس كيف البراني

الڭلب فضة ولكويسات نحاس

وناقوس نفيق بيه الناس لحاڭراني

ربع ريالات ميالات يا لعطشان شاني

الكلمة شمس معانيها من شاني

داز من لعمر ما داز

فوق كتافو الهم هاز

والحلم مفكرو ونساني

قلت حيلتي وهواني

وزوبية ليام ف هواها مطيحاني

جوج رايلات ميالات

يا لعطشان من واحد فاني

ندلل من مايا ف نهار حار ڭهار

ياااه م ڭساني

بحر الڭطران ما بارد

يرد محنة عمريواللي داز

واللي معايا صاح من كثرة لجراح

الصبر من صبرنا نحث منغاز

وفين ما نجي نستراح

تتخايل ليا المحنة طايرة ف صيفة باز

او باز من صبرنا او ما ضرنا

او مادرنا ب كلامو

او ما غرنا غير سكاتنا

هاز علامو

منا الدڭاڭ او منا لمهراز

و ف كل دڭة يبلغنا سلامو

ونسمع كلمة لا ولا لالة

لابسة تشامير حرير

بانت ف أحلى حلة

تجرح الخاطر وتزيد الڭلب علة

او لا نشوف الكرموص حلا

وخلا الدرڭ خلا

ڭالتها الدبانة ڭبل النحلة

او لا ذلات شادة صف المعاني

ها الغالي ولا فابور

يا زريعة البور

واش الشتا تمنعت علينا ثاني

صافي الما الصافي ما بقى صافي

تخيطت علينا عيون الغربال

والبال ما بقى صافي

كثرة لنذال دال ع العوافي

مول المعنى ڭسيان

والهبيل بغطى غيرو دافي

خود عمري بيع وشري ورهن ما

ما تعرف نتجمد ثاني

تنصبت لمصيدة ف عتبة لكلام

وڭاع حروف الزين سالباني

و خفت نكون حبة ف الرحا

نتسحق ب حق ولا بدون حق

ونتحرڭ رماد

وانا شاد الصف ف عين الرحا

نحلل ف المعاني

باغي نرتاح من هم الليل

و غم الصباح وكيف نقدر

 والورد ريحو فاح

شالي بعلامك نعرفك منا

راه ملون بدمنا او صبرنا

اولا مجاوبناكش عرفنا متنا

آ العار يا سامع الكلمة

وفاهم المعنى

واش تقدر تصنع من دموعنا

واد يسقي ربيعنا اللي سكر

تبين فينا اللي خان او غذر

اولا خفت من ملحة لبحر

لحڭ علينا للقبر

وخا اللي ف الذات مات

او ما نرضى ب لفتات

منك انت بالذات يا ذات

يا لمحناني باللي مضى او فات

ڭراب لابس دربالة

والليالي دخلت ب لهيف

ما عارف يفرق الما

اولا يفرق الزهر اللي ما عندوش

من حر الندى

وكية السمطة الراسمة حروفها

واعداوتها على كتاف الصيف

ونجيك في صفة ضيف

رسمني ف خيالك لك

نتخايل لك كيف ظلك كيف ذلك

يا محنة ليام كيفاش محيتي ليام

من صدر المشتاق

وكيف تاق بدموع الشموع

والحق الممنوع او شكون سمع

الدموع اتافقت على الخدع

تنصبت المصيدة ف عتبة ليام

وشكون عتق

او تمدت يدين تطلب

او شكون نفق

او تكمشت مسيكينة خافت من لبرق

او تمدت مرة اخرى

هاد النوبة ناوية تسرق

او من تاب خود من كتاب ايامي

او نسى العتاب

وقف على باب الحليف

وابدا بالليف او بالسيف

تحني الراس من تشوف الدموع

الغالية تنزل على وراق الصبر

وبالمعنى تداس

ماهي معدودة من السما

او ما هي محسوبة من جرح الناس

نعست القبيلة عطشانة

تتسنى يرجع الڭراب ف صفة كتاب

اولا لوحة مرسومة ضاحكة

م الداخل تقاسي العذاب والحسرة

تصبغ بكحل الليالي

الراس اللي شاب من ضو الڭمرة

ريال ميال يا كيال شريني

شري واحد فاني

تشوف ف عينيه

وعينيه تحكي المعاني

تشري واحد خانو حظو من ثاني

او فين ما نڭول نحل العڭدة

يتعڭد بيها لساني

وفين ما نجي نفرح

تبكي عيني من ثاني

 

 

شاهد أيضاً

تطبيق تحدي المعرفة حمله مجانًا

        يحوي التطبيق على 12 تصنيفا الأدب العربي اللغة العربية التاريخ صدر …

أم على قلوب أقفالها – محمد فتحي المقداد

  مع بداية انطلاق حياتي العمليّة في العام ١٩٨١، انقطعتُ عن الدراسة في الصفّ الحادي …

هل أعجبك ما قرأت ؟!

%d مدونون معجبون بهذه: