الرئيسية / أخبار ثقافية / شاهر خضرة “الحكي على غاربه”

شاهر خضرة “الحكي على غاربه”

من نصوص بالعامية سميتها ديوان “الحكي على غاربه”

1- سلّمْتْ عليها متل ما بيعشِّب الفلّاح زرع السواقي صارت كفوفي خضره
متل العروق اللي على إيديها ظاهرة
بعثت نظرة طالعه من جوّات الأحاسيس
لما كنت أمسك التراب يصير ضحكه بتُمّ صبيّة موعود فيها القمر
بعثتْها لـ عُبّْ النبع اللي نعسانه شفايفو تحت الطحالب
فاتت متل ومضه فات معها شعوري
عطشانه صاحت جوّات نمّالات المَيّْ
عطشانه
هاي روحي متل ورقةْ ريحان منسيّة بكتاب
جمدانه وريحتها صارت بذاكرة اللي غابت
السما زعلانه مقاطعه المزاريب
الحيطان كمان لبست طقم إسمنت وعم تتخايل لفوق
وكل شي تحت عطشان ،
الياسمينة .. وردة الجوري .. التراب اللي عَ الصخر
قشر الدالية
خيطان اللي طالعَه من اﻷرض تحت الصفصافة
كل شي عطشان
حتى الكتب عطشانه للعيون اللي قرأتها
وخفت …
خفت صوتي تبلعوا السراديب
لبسْتْ السراب وفُتّ وراه
اﻷرض من قلّة المَيّْ عم تعلك لحم الصدى
خفت أسألها ليش ويصير صوتي هوا بجوفها
يدور متل ورق أبيض ما مسَّه حبر
كأنْها الأرض عم تمشي بنومها
وأنا جواتها انقطع قلبي ..إنْها توقع من فوق قرن الثور
ويصير راسي لتحت أنا وكل العطشانين
معقول أشرب من أصابع قدامي ؟.
والشجر يصير يلبِّع للشمس بشروشو
والسما اللي كل يوم بتحط بكفوفها بوسة الصبح
بتكوّرْها و …. بففف …. تبعثها ،
شو ممكن تبوس ؟.
الشمس شفايفها كتير رقيقة ممكن قرن الثور يجرِّح لونها
ويعطي على حَمَار متل لون الشقايق .
لازم يكون في شي تحت
وأشيا كمان فوق
العطشان دوم هواجسو كتيره
مناماتو كلّا مَيّْ
صافيه زرقه خضره عكره مو مهمّ
ﻷنّو المَيّْ مو بس بتعكس صورنا
كمان بتعكس قلوبنا تفاح
حتى العيون متل ما بتشوف المَيّْ … هيِّه كمان بتشوفو
المَيّْ متلها بتعطش
مبارح لقطْتُ قطره مضيّعَه العنوان وراجعه
قالت لي لو تفهموا المَيّْ
بتفهموا الموت
حاولت أفوّتْها معي ..
وحلفتْ لها ما أبل شفايفي بشفايفها لا عن حب وﻻ عن موت
خافت ….
قالت لي إنت ساكن وحدك
وأمي وصَّتْني إذا قلِّك وحداني تعي معي لا تروحي
ﻷنو بيشربك
الوحداني إذا ما مات لا تصدّقيه .
العطش متل اللي لوحدو
كمان مالو أمان
فكيف لو صار على تُمّ البشر . و ..
هرْبَتْ ….
هرْبَتْ وتُمَّي بكى متل يتيم وحداني
ماتتْ أمُّو وخيَّطْ رجليه بتراب قبرها
عقَدْ خيطان المَيّْ اللي نزلت من عيونو مالحة
وقعَدْ يستنَّى تقوم القيامة ..
تقوم أمُّو ..
أو شي قلب يحنّ
من تحت ..
من فوق ..
يحنّ ويبعت مَيّْ
حتى القبور إذا شربِتْ ممكن تصير حديقه
فيها فراشات ونِدِي وتسلِّم اﻷرواح على بعضها
بإيدين
تصير كفوفها خَضْرَه متل كفوف اللي بيعشّبوا
خَـضْرَا بلون المَيّْ على ورق
لسَّاتو على أمُّو الشجره
مو وحداني .
***
2-
…….
كنت أغار على أمّي من جوزها بس رفَضْتُ أروح معها
لما جا الموت وأخدها ترجّيتو هالحقير ياخدني معها
قلّي أنت مو أنثى
بكرة ببعتْ لك موتةْ على كيف كيفَك.
وبعث لي موتات بالجمله
عدد سنوات القمع
عدد الشهدا والقتلى وذرَّات التراب المصبوغه بالدم
وللآن ما عجبتني ولا موتِه
تصوَّروا
لالَّةْ
شقفة لالَّةْ بآخر الموت خلال شهور قليلة
صارت مموّتّني بالحب عدد الشَّعر اللي براسها
والشِّعر اللي كَتَبْتُو .
وإذا مو مصدّقين إنِّي ميِّتْ
حبّوها متلي .
***

الدار البيضاء – المغرب
صيف 2014
شاهر خضرة

شاهد أيضاً

تطبيق تحدي المعرفة حمله مجانًا

        يحوي التطبيق على 12 تصنيفا الأدب العربي اللغة العربية التاريخ صدر …

أم على قلوب أقفالها – محمد فتحي المقداد

  مع بداية انطلاق حياتي العمليّة في العام ١٩٨١، انقطعتُ عن الدراسة في الصفّ الحادي …

هل أعجبك ما قرأت ؟!

%d مدونون معجبون بهذه: