الرئيسية / الزجل / من زجليات رمزي نايلي الجزائر

من زجليات رمزي نايلي الجزائر

 

رمزي نايلي 

 

من وكتاه، صار الشعر زوز كلمات،

يتضاربو مع بعضاهم باش يعطوك النغمة.

الكلام سرجْ،

الفرسة هي الروح المذبوحة بسيف يّطَّول العمر,

و انت ما عطاك ربي غير كثرة اللسنة ،

ما عليك غير تخيّر لسانك المسُوُسْ،

خليك من الملحْ، و اتركز على ضروس أيامكْ،

باه يتفتت المعنىَ,

الدمعة عمرها ماكانت ورقة يثبت بيها الحزن حضورو

و الحزن اذا كانْ مثقوبْ، لازمو سطل نسيان و عروَتو هي الدوخة,

و كيفاش ندوخو؟

كيفاش يولي الكاس شاقول توزن بيه المشية أيامها,

يا العطشان لطيحة تخلي ليلك ما يفرقش بين بكيتك و نجومو؟

لازمني نحكي، على الشي اللي يوجع القصيدة،

و هي منطوحة بمعاني ما يقولوهاش,

خليك من الوزنْ، و ارواح معايا، نمسدو ذراع الكلام،

و نمضغو الشي لي مايتقالش.

نكتبو السكات بنبرة الحبيبة،

و نرميِوْ الموسيقىَ لغروب الشمس،

يجي الشعر ، من روح واقفة على راس كاف راشي

و حابة تعوَّض كل حياتها في وقت الطيحة.

الشاعر ، يوفر كل ما يلزمْ للجرح باش يبقى يقطر،

يغنّي للدم بالحمورة

و يشَرَّبْ السكرة، بصحو عوامو ،

صحوو للي ما جابلو غير وجع القلب,

و مرض هاذ القصيدة.

شاهد أيضاً

تطبيق تحدي المعرفة حمله مجانًا

        يحوي التطبيق على 12 تصنيفا الأدب العربي اللغة العربية التاريخ صدر …

أم على قلوب أقفالها – محمد فتحي المقداد

  مع بداية انطلاق حياتي العمليّة في العام ١٩٨١، انقطعتُ عن الدراسة في الصفّ الحادي …

هل أعجبك ما قرأت ؟!

%d مدونون معجبون بهذه: