الرئيسية / الزجل / يا طفلة راني نبغيك محمد علوان تونس

يا طفلة راني نبغيك محمد علوان تونس

 يا طفلة راني نبغيك

يا طفلة راني نبغيك

و قلبي معلق بيك

نحبك و نموت عليك و ما عنديش خيار

..

لا عندي رادة نخاطيك (1)

و لا مال إِلّي يشريك

كان روحي بيها نفديك .. عير و جيبي لعيار

..

يا طفلة راني عيرتك

مليوم إلي شفتك

حطيتك علقلب وزنتك .. رْكِزتي و قلب طار (2)

..

ما ندري كيفاش سايرتك

جبت خطاك و جرتك

و مرجعلي عقلي وسيبتك كان كي جبتي باب الدار

..

يا طفلة مسمح كلامك (3)

من وقت الي كلمتك

زاد تغلغل في غرامك و شعلت في النار

..

نصبح و نمسي على هيامك

سارح في مملكتك

ورد خدودك وجفانك و عيونك ضحكات النوار

..

يا طفلة خواطري حبوك

منيوم الي عرفوك

حلفو علي ما يسيبوك و ما تغمض لي شفار (4)

..

كان كي يتهنو و يشوفوك

قلبك فقلبي مشبوك

عشبة بايديهم يسقوك .. في عنيهم ليل مع نهار

..

يا طفلة هذا الي صار

عطرتي عمري بشذاك

رماتك في طريقي لقدار

حبيتك .. هاج علي هواك

كالشجره على ضفة لنهار .. زيد هاجت عليها لمطار (5)

_________

محمد علوان

20/01/2015

(1) رادة نخاطيك = إرادة الإستغناء عنك

(2) ركزتي = ميلت الكفة

(3) مسمح كلامك = ما أحلى كلامك

(4) شفار = رموش

(5) زيد = هنا بمعنى (زيادة على ذلك)

 

شاهد أيضاً

تطبيق تحدي المعرفة حمله مجانًا

        يحوي التطبيق على 12 تصنيفا الأدب العربي اللغة العربية التاريخ صدر …

أم على قلوب أقفالها – محمد فتحي المقداد

  مع بداية انطلاق حياتي العمليّة في العام ١٩٨١، انقطعتُ عن الدراسة في الصفّ الحادي …

هل أعجبك ما قرأت ؟!

%d مدونون معجبون بهذه: