الرئيسية / الزجل / أوااااااااااااه فاتحةالمير

أوااااااااااااه فاتحةالمير

زجلية بعنوان

أواااه11224464_745139915613084_6927378293101650260_n

حُبْ…ولْبسْني لْباسْ

زدحي وزيدي زدحي يالجراحْ

شطحي…ردحي…فرحي

فيضي الكاسْ

ماكاين باسْ

عرفتيني مازال ماحطيت السلاحْ

مازال هذ الڭلب ماسلمْ…

ماطال الليل خاطري عساسْ

نكابرْ نخممْ…

ونواقسْ الساعةْ كِلَماسْ

تَرْشَكْ بالجوفْ كْبالةْ مْسقمْ

حتى يفكهرْ النهارْ

والبالْ مازالْ مدغبشْ محتارْ

حالي يزيد يتأزمْ…

كيف تقطعت لخبارْ؟

كيفْ نديرْ مع هذ النارْ؟

وانا إلى مانشوفو

يحرامْ عليا نتبسمْ…

مشوشة…وعروقي كادية جمارْ

بمدادها الفايض مرار

ننقشْ…نزممْ

سميتو على لواحْ

بابْ المرسمْ

والكلبْ صَداحْ

زدحي وزيدي زدحي يا لجراحْ

عرفتيني مازال ماحطيت السلاحْ

مازال هذ الڭلب ماسلم…

عشية وصباحْ

نترجى ملقاهْ

لعقلْ سطاهْ

نتحسسْ كشطة لكدمْ

وبرموشي…

برموشي نطرز حروفو لملاح

والڭلب المجروحْ

لوانْ ومرشمْ

حتى نْرَوحْ رواحْ

صوتي مبحوحْ

ريقي ناشفْ علقمْ…

آه شحالْ تمنيتْ تتوالفْ لرواحْ

آه شحال تمنيت تتوالف لرواحْ

يحضرْ عودي لدهمْ

على صدرو نرتاحْ

ننسى مدى مَن هَمْ…

آه على زهرْ خاطري لمظلمْ

آه على زهر خاطري لمظلم

آه ياهذ لجراحْ

راني معاك نتكلم

ماحَنْ…ماطلقْ لسراحْ

أواه…شحالْ كدني مانتألمْ…

أواه…

سلبني هواهْ

تيقتْ بكاهْ

أواهْ عليا أواهْ…

مدى  كنت نحلمْ

أواهْ عَلْحُبْ شْحالْ احكيتْ

أواه علحب شحال دويتْ

وكنت نفهمْ…

واليومْ عادْ دْريتْ

مازال شَلا مانتعلمْ…

أواهْ عليا أواهْ

حبيتو وتمنيتو

تسنيتو…

مانسيتو

بيني وبين نفسي

شحال ناديتو

ولا جوابْ…

صَبرتْ كلبي

ماعديتو

مْكَتبْ عليا لعذابْ…

أزدحي وزيدي زدحي يالجراحْ

شطحي…ردحي…فرحي

فيضي الكاسْ

ماكاين باسْ

عرفتيني مازال ماحطيت السلاحْ

مَازَالْ هَذْ الڭلبْ مَاسَلمْ…

شاهد أيضاً

تطبيق تحدي المعرفة حمله مجانًا

        يحوي التطبيق على 12 تصنيفا الأدب العربي اللغة العربية التاريخ صدر …

أم على قلوب أقفالها – محمد فتحي المقداد

  مع بداية انطلاق حياتي العمليّة في العام ١٩٨١، انقطعتُ عن الدراسة في الصفّ الحادي …

هل أعجبك ما قرأت ؟!

%d مدونون معجبون بهذه: