الرئيسية / الزجل / مقاطع من جنان الصالحة عزيز محمد بنسعد

مقاطع من جنان الصالحة عزيز محمد بنسعد

جنان الصالحة

عزيز محمد بنسعد

من ديوان داروها لحروف وحصلو فيها لمعاني

 

– 1-

 

دور بالناعورة

يا بوكربة مكعورة

آش كلت وآش شربت

مع لكلاب لمسعورة

انت اخرج

تشبح على كرشك ودرج

وشوف الحال

واش تغربى ولى مازال

ورد البال من لكلاب لمسعورة.

– 2-

ناب الجفاف زرك

ما مشى حتى خلى أمارة

في ساك كل نوارة.

– 3-

شوف من قلة زهري

ما حط جراد الوقت

غير فوق زهرة عمري

هي دابا الجراد دري.

– 4-

آفلانة

تانا حقي في الكتبة

كد حقي في هاذ الشعب

راه ع كد حقي في لمداد

كد حقي في هاذ لبلاد .

– 5-

جراد يمرد فوق الأرض

يفليها بالطول والعرض

بايت وضال يبيري

على وراق التوت

خلاني عريان سري.

– 6-

انا حقي في الله كبير

انا حظي في الحرب صغير

كول ليا آش ندير..؟

نكحز..؟

نمرد..؟

اولى بجناح نطير..؟

كول ليا.. كول ليا.. كو

البراكة في راسك.

– 7-

شكون كد يجمع الوكفة

ويوقف على رجيلة وحدة

ويكولها وجمافو

أجرادة مالحة

فين كنت سارحة..؟

– 8-

جراد وطالب ضيف الله

واقف على باب السبول العطشان

والله كون كنت شتا نطيح معاه

واخا ع بين الكركاز وبلعمان.

– 9-

هاك آراوي

وكتب على لوح جبال الأطلس

كل ما ترجلت

وبغيت ندير فيها نفس

تشرع في وجهي بيبان د الحبس.

 

 

 

 

 

 

 

 

 

 

 

 

 

 

 

 

– 10-

خسارة يابو نوارة

ما تبسمت دفة مارس

ما تشرع باب

وخلى غرس النقلة يديع

حرنت شوكة حمارة

وجهلو كليبات النصارى

ما تحل عليهم باب  الربيع

شاهد أيضاً

تطبيق تحدي المعرفة حمله مجانًا

        يحوي التطبيق على 12 تصنيفا الأدب العربي اللغة العربية التاريخ صدر …

أم على قلوب أقفالها – محمد فتحي المقداد

  مع بداية انطلاق حياتي العمليّة في العام ١٩٨١، انقطعتُ عن الدراسة في الصفّ الحادي …

هل أعجبك ما قرأت ؟!

%d مدونون معجبون بهذه: