الرئيسية / الزجل / ليك يومك ويومك ماهو لحد…محمد سقاي

ليك يومك ويومك ماهو لحد…محمد سقاي

ليك يومك ويومك ماهو لحد…

ليك يومك ويومك ماهو لحد…
عيش سويعاتو وتونس بها
نسى البارح وزيد الغد…
وغنم الوقات الٌي عايش فيها
الدنيا يوم ويوم…من لتنين لحد…
لا تامنها ولا تعول عليها
مره جايبه الغربي ومره الصٌهد…
كيف جات لكٌاها و مرحب بيها
طنشها ملي تبعد منك وتصد…
وملى ترجع لا تربطشي فيها
سعدها مره يتكفا ومرات يركٌد…
تعيا تفيقو وهو مجبد مستحليها
صبر وخلي صبرك فوق الحد…
ديرها ف يد الله فين بغا يدٌيها
خلٌي ايامك …السبت كي الحد…
سميات ليام آش كماك فيها
ما يسال فيك حد ما تسال ف حد…
تهنٌا ف دويرتك وقرق فيها
دير كيف ما دار داك القرد…
غمض عيونك آش حاجتك ييها
سد دوك الودنين لاتسمع لحد…
زم… وكلمتك كَيٌدها وحضيها
تدوز عليك عوام م الجد والكد…
على خبزة شحال حلمتي بيها
تجيك هموم آش تسمي واش تعد…
الراكٌدين إفيقو وطيرو بيها
إلى بغاتك تجي وما تشاور حد…
لي ماعندها تسلفها وتكريها
بنهار راك تكحش وبالليل تعد…
مفتون بطمعها وهايم فيها
الدنيا نكٌاره ماتعرف لا بو لاجد…
لا تغرك بزينها ومالها ومٌاليها
تطول لعمار وكل عمر إلو حد….
لا تطمع عل دوام تعيش فيها
إجي يوم… واحد من التاني يبعد…
يا هي تفوتك يا انت تخلٌيها
راك تعيا تركٌل وتعيا تجبٌد…
تجري وتجاري تجمع فيها
إجي يوم إتقطع منك اجٌهد…
بتوب آبيض تمشي وتخليها
الموت جايه وتقرٌب م البعد..
وعوافيها م الكٌدام تحس بيها
كلما طالت تزيد تكٌدا وتزند…
نيران سكراتها آش جا يطفيها
آخرتها موت…لاش تسخن وتبرد…
السفينه ليها قبطان كٌاد بيها
سبحانو واحد ما بحالو حد…
ب كن يجريها …وب كن يرسيها
محمد سقاي

شاهد أيضاً

تطبيق تحدي المعرفة حمله مجانًا

        يحوي التطبيق على 12 تصنيفا الأدب العربي اللغة العربية التاريخ صدر …

أم على قلوب أقفالها – محمد فتحي المقداد

  مع بداية انطلاق حياتي العمليّة في العام ١٩٨١، انقطعتُ عن الدراسة في الصفّ الحادي …

هل أعجبك ما قرأت ؟!

%d مدونون معجبون بهذه: