الرئيسية / الزجل / غير……..داوي عبد الله تويس

غير……..داوي عبد الله تويس

غير……..داوي
______________

كلشي تيعيط
او غير بسكات
ششششششت
الريح تيغيط
التيه تيخيط
او لگلبة ف اسراب شطحات
ها لحلمة تفسرت
او الزهرة تعرات
ها النعرة تبندت
او الشمس غربات
فين ديك لهدية
فين الزين بات
خليو الصمت يهضر
راس اصبح كدية
الشين بغا يشعر
او السين اسعر سعرات

—————————–

حنة ياااااااااحنة

فين يامك ياحنة
في دندين كلامك
تخرطت من ليام البنة
او مشات لمة لمحنة
راك مزال ف گلبي ساكنة
حبك انت جنة
وشامك انا ما نسيت
ضحكة عيونك انا مانسيت
توحشت حجايتك
او عليك احنة شخال بكيت
شكون يمسح دموعي
عطشت
رويني من بير احضانك
فين مشيتي ياحنة
شكون يرشني بريحة لمحنة
لله رجعي نقولك كلمة
فسري لي هاذ لحلمة
لقلوب سكنها ظلام
غنا لغرام اصبح بكمة
ثقالت كلمة السلام
او لكمة ولدت مسامر
او خبار لحب ف بخور لمجامر
شحال قد لمتلوف ما يكابر
غمة على غمة
بلمطارق او لمسامر
للحداد يكوي لحديد
لبالي يفضح جديد
او لوليد يربي وليد
وانا توحشتك ياحنة
لله رجعي لهنة
نجمع شطايطي او نمشي معاك لتمة
لكلمة نعس لها لسان
لكلمة صبحت بكمة
غير ديني معاك لتمة…..

—————————

غير عقل فيها
او ديرها فين تجيك
لميها خرودتيها
لحلمة شتتيها
او الرگدة طفجتيها
حتى لبيضة مرجت فيك

ثمرة اظلام جنيتيها بكرية
او يتمتي اصباح ف اشراقو
تگرعتي صهدة شرگية
حرگتي لورد او عباقو
بعرتي جدر ف عورة الليل
ناضت جشرة مجرابة
او بين لحرفة او النصابة
دفنتي ضو لقنديل
دابا يضربك حمار الليل
او تخماجلك الركبة
عكازك تلقاه عليل
او فعايلك تشربها نكبة

—————————

غير…….داوي

لوجه زين
لقلدة قياس العشق
او لعقل بهيمة

كلشي باين
ف لسان النطق غرق
او لكسدة كريمة

اشنو نساين
لحب لقمة ف اجدق
او تحتية بلا دفينة

———————

شمخات

سكنات التلفة فوقتها اوحيحات
سكنات بين ضلوع او عشْشات
او ف عشها بيضات
فقصات التلفة او زادت فرخات
اولقات لي يشهر سلعتها بالباقات
سكنات او تبتت اوتايدها او تهنات
لصقات بالكولا او ف لمخاخ ربعات
تَوْلت لفهامة بالخزعبلات
حنات بالبارود او لكلاب خيلات
عقول كثيرة تعلقت بها اوحلمات
النار كدات
لخبار ف البارابولات تعفنات
من عشق خمرتها لعقول تمشكات
لقلوب تغلفت بغطاها اوتصدات
لمداد يبس او ادواية تخرودات
التلفة من كثرة تلفتها ضحكات
تغذات من فتاوي بيضتها مرجات
مشات فرحتنا مشات
دموع بكانا تشتات
الشمس غربات
يالله لعبو
يالله نفرحو
التلفة في الميدة مرفوعة
يافرحتنا بعروستنا جات
غنيو معايا اوفرحو بتلفتنا
راه القصرة حلات

——————————-

غبر…………داوي

بللنا طعامنا بعام من اشتا
او قالو طعام ناشف
او ذاك ل فينا حالف
نكت من غرايبنا نكتة
او ضحكت عمتي الشمتة
او من ريق الضحكة
شاط لبلول
او طعامنا تسقا
تفلحت لعقول
او سكرت بلمرقة

—————————

دليت اسكاتي
بلا حبل ف بير مهجور
سقيت منو لعامر ف لخوا
عمرت سطلي
فاض بدموعي لخلا

عنقت صلاتي
ثقل على ظهري منشور
قلبي من حر لهوى
تلوى
لحساب كولو شاط لي
او جدبد راه بلا

زيفت حلمتي
بفياق مذعور
من نعاسو تكوى
راسي من راسو ناضلي
صداع ل نسيتو راه ولى

البوهالي

شاهد أيضاً

انتصار تاريخي لتويتر على رئيس أكبر دولة بالعالم

انصاع رئيس أكبر دولة في العالم لشروط أملاها عليه “تويتر”، أمس الأربعاء، ومنها علم دونالد …

إصابة مدافع ريال مدريد بفيروس كورونا

أعلن نادي ريال مدريد الإسباني، الاثنين، إصابة مدافعه ناتشو بفيروس كورونا، بعد أيام من إصابة …

هل أعجبك ما قرأت ؟!

%d مدونون معجبون بهذه: