الرئيسية / الزجل / الدار البيضاء مدينة الشجر والحجر والبشر عزيز محمد بنسعد

الدار البيضاء مدينة الشجر والحجر والبشر عزيز محمد بنسعد

الدار البيضاء
مدينة الشجر والحجر والبشر

عزيز محمد بنسعد

القلم اللي تنجر
رصاصو من لحجر
تقبتي الورقة
هاذي صفحة وطويناها.

دية الصبر
نكتبوها بالخضر
اقلب الورقة
هاذي صفحة وبديناها.

ها وراق الدالية
ها حليب الشجر
ها حموم قلبي
ها دم الشوهادى بين يدينا
ها حنة هاينة
مدوا لكفوف يا العزبات
هاذ لكواغط نسيناها.

نسينا عبيدات الرمى
ف مشاكة سالف
والسالف تابعة
على كدا من لسان رويناها.

ها تنهيدة المقهور
الطالعة من شك لبحور
صابة طوفان
ياه فيضان
ايلا نسيت فكروني
قولوا ليا باش تليناها.

شفت في كتف الدنيا
واحد ناظم لحروف
مدجة لوبانها كلام
ولاخر حالب لخروف
والشاهد مكدب
آش جا ما يطلع من الجوف
واش لخروف يتحلب ؟

شداتو لرياح
وسارت بيه لدروب لجراح
آح آح حاح

مدى من طير
باني عشو من ريشو
ومدى من طير ليه
طير ليه جناح
آح آح حاح.

ما كاين باس
ايلا مضات عليك لماس
يا فروج النحيرة

كيف العادة
ذبحوك بلا شهادة
وها دمك قاس
قواس الدار البيضاء.

ها الما .. ها جابيل
لا حيا في الدين
قابيل ما قبل على هابيل
انا وانت واحد
من تريكة لمهابيل
انا وانت جوج
في عرف ها جوج
هما جوج.

قال سيد القاضي
جوج ما يقودوا السفينة
جوج مراود تعمي العين
وجوج جوج من الحاجة رفود
تفكور لصباح الدنيا
زغرتي يا الزغراتة
ها غرامتي يانا
في حجر الدار البيضاء.

 

شاهد أيضاً

تطبيق تحدي المعرفة حمله مجانًا

        يحوي التطبيق على 12 تصنيفا الأدب العربي اللغة العربية التاريخ صدر …

أم على قلوب أقفالها – محمد فتحي المقداد

  مع بداية انطلاق حياتي العمليّة في العام ١٩٨١، انقطعتُ عن الدراسة في الصفّ الحادي …

هل أعجبك ما قرأت ؟!

%d مدونون معجبون بهذه: