الرئيسية / الزجل / داروها لحروف …وحصلت فيها لمعاني ! عزيز محمد بنسعد

داروها لحروف …وحصلت فيها لمعاني ! عزيز محمد بنسعد

داروها لحروف  …وحصلت فيها لمعاني  ! عزيز محمد بنسعد


رواحي يا جراحي رواحي
ماهمك بكايا و نواحي
زايدة يا بنت الهم و تقصاحي
لا سعد لا فرح بقى ف لواحي


نكتب هاد الضيم
بريشة طاحت
من ريشات جناحي

وها مدادي
باش ندادي
شق طريقو في لبياض
ولا من بيض سعد هاد الورقة.

من جرح لجرح نعادي
وسط خيم لمصايب
نحفر مطمورة في القلب
وندلس بالعجنة
شوقي لكل تاقة
نرومد ونحيل
و نشرب كينة الفار
ولا غربال من غرابلك
يا بوسيار.

انا كمحة
و انت حتى انت
من سعد الرحى
من جهة البر
لا طريق تدي
و من جهة البحر
لا طريق تجيب
و كبرت فينا الله يجيب.

و يجيب ليك الله
ان لغربة
مفرشين لعابن القبة
و شعلو فتيلة نار لغيار
بلا سبة.


طلعت البلغة فوق التسريح
و تشرشم التسبيح
في دار لوضو
يا نوضو
يا خيم القهرة تكعدو.

وايلي بويا مداح انا
في صفة براح
مدو حبال المعنى
و دليوني في الدواية
نهبط لقاع الناس
ونشوف منبع بكايا.

تبسمت دفة الدموع
و شفت ما زمزم
يتوضى بتلج املشيل
بالسيف عليك يا فمي ما تزم
غراف و كلة
محاميين على سيف
يغسلو في الدم السايل
و الدلو و الخابية يشلو فيه
بالسيف ما يكون حالو مايل.

نوحي ياداتي نوحي
غزيتي فيا انت و جروحي
ضليتي ، وظنيتك تروحي
الساعة ما مشيتي
حتى خلتيني واحل في روحي.

أنا مزاوك
لا تسيفي لولادي الجايين
في صفة جرائدنا
في صفة جيوبنا
في صفة جفافنا
في صفة جوعنا
في صفة جورنا
في صفة الجورني.

ها العار
ايلا غلبتي ياجروحي عفي
راعي لولادي الجايين
خليهم مكيلين
في ظل غابة روحي.

نسال فيك
زنيكة المحنة
ماشي حلفة الغدر
نسال فيك
لكط المحبة
ماشي ع شاهد القبر.

عقلي يا معدومة لوفا
انا ، لا هنا لقيت هنا
ولا القبر فايت شبر
ناس وطايحة على جهة
وفين عباين الصبر؟

امضرى؟
ياالساكنة فيا بدون كرا و شرا
شرطي عليا انا خليلك
واش كاين فاش نعاونو في رحيلك
نمسح ليك السما بليكة
و تقطر عليا كربة الغم
كولي يابنة الهم
هاد البرامل ديالاش؟
- ديال الدموع الحايلة من ماي
وهاد الموزيط آش فيه؟
- فيه كفن الحراكة
وهاد الرزمة آش فيها؟
- هاديك فيها الدنيا وما يفنيها
وهاد الميزان؟
شفت كفوفو من النحاس
وصروفو من اللوبان
فيه واحد الخفة
ايلا حطيتي ع تنهيدة
تميل الكفة.

حطيت الكلمة في كفة
و حطيت المعنى في كفة
و لقيت الكفات معادلين فيه
و تمنيت كاع من نسالو شي حرف
غدا يوم القيامة
نحاسبو عليه.

كانت هادي
شوكة في مدادي تتقب الصمت
وانا ما قريت
ما قريت الورقة علاش بصمت.

يمكن داروها الحروف
و حصلت فيها المعاني
حتى معنى ما خطاتو حروف الزين
عا نوض و كتب معنى
على جبهة البلاد
فين بدات ... وفين تسالي..؟
كول حدها الذات
بحال الشمعة كدات
حدها الفتيلة تسالي .

 

شاهد أيضاً

تطبيق تحدي المعرفة حمله مجانًا

        يحوي التطبيق على 12 تصنيفا الأدب العربي اللغة العربية التاريخ صدر …

أم على قلوب أقفالها – محمد فتحي المقداد

  مع بداية انطلاق حياتي العمليّة في العام ١٩٨١، انقطعتُ عن الدراسة في الصفّ الحادي …

هل أعجبك ما قرأت ؟!

%d مدونون معجبون بهذه: