الرئيسية / الزجل / من درر ليلى عبد الجبار الزجلية

من درر ليلى عبد الجبار الزجلية

بغيت نكتب ونزيد نكتب
على نغام لمعاني نجدب
يتحير هاذ الحرف
يسوس الغغلة ف جديبو
يعمر ب الفرح جيبو
ويفرقو غرامة عل لكلام
يزهزه على خدود لوراق
يجلي في حماقو لحماق
يجليني ف لوانو وزواقو
نغرق..نغرف من رحيقو
نولد من حر الطعنات،
ضحكاااااااااات

*****************************

يالي حرزتي الخطوات
يالي هيتي لمحبة
بوجه قااااسح…
دببت فيك الجهد بالعند
وانت جافل،بير نخوتك
بالدوام واااكح…
نهيم فيك بالشبر والكامة
نصيب قلبك كحل ،مودر
ف لغدر ساااابح…
تطل حنانتي ف مراح روحك
تطل على ديك رحبة النوار
بلا ما تشاور، نجبر رحيقها
سم.على روحي ساااايح
.*************************

خلوني ف حق لمروة
ندوق لمرار
يكون الصبر زاد الخطوة
يكون سترة للشمتة
ودواء لجراح تسيل
يكون حزار
حنوط لعشق صافي هبيل
لناس فيا، ميتة حية
وأنا زهري ف عشقهم دليل
يركد لكدار
ياخطواتي لمتلياني بلا تاويل
يا قلوب عشقي ليها مغلوب
حقي فيها هو لقليل
ك ضل مسمار
ياخاطر عيات تراود ف الباس
فجعتها كبيرة ما ليها لقياس
مفيضة لمحبة ف شحال من كاس
وعديانها كثار
يا شميعة دبلتها وناسة لوقات
وعمر زين ف التسنية فات
وشحال من تفكيدة وتفكيدة
قصة قديمة وقصات جديدة
تشعل ك النار
والمحبة الفايضة بيها الذات
حامية مغرقة حنانتي ف قلوب
كبدتها بردات
—————–
بقلم
ليلى عبد الجبار–
المغرب-

شاهد أيضاً

تطبيق تحدي المعرفة حمله مجانًا

        يحوي التطبيق على 12 تصنيفا الأدب العربي اللغة العربية التاريخ صدر …

أم على قلوب أقفالها – محمد فتحي المقداد

  مع بداية انطلاق حياتي العمليّة في العام ١٩٨١، انقطعتُ عن الدراسة في الصفّ الحادي …

هل أعجبك ما قرأت ؟!

%d مدونون معجبون بهذه: