الرئيسية / الزجل / كانت النخوة نيف إدريس بلعطار

كانت النخوة نيف إدريس بلعطار

كانت النخوة نيف
إدريس بلعطار

كانت بالفلجة
ڭبل ما ندلڭوها
هي ضحكتنا
وكان حسها لعلاع
***********
وكانت لمحبة
ڭبل ما نشتاڭوها
ملحة ف ڭصعتنا
وكان في الخاطر تيساع
************
ياك غير
حتى لهنا وتالي
وكان فالك هو فالي
الرجلة كلمة
والكلمة حلمة
والحلمة خير وسلام:
أما نڭول ..حمام
أما نڭول:
نسمة سايبة
جاية وجايبة
في جلالها ريحة النعناع
************
اياك غير
حتى لهنا وتالي
وكان حالك حرّاش ڭبالي
النخوة نيف
ولمعاني سيف
وكانت الضايڭة
والجماعة سايڭة
والنية شحال قريبة
والصفا حاضي الغيبة
ڭولوا اش طرا
حتى صار
لبهوت فينا شانع وشنّاع
************
ڭولوا اش طرا
حتى تخالفت النظرة
والشعا ماعاد شعا
درحاتو شلا كحولة
والضحكة صارت صنعة
لا سر فيها
غير لفوام محلولة
ڭولوا اش طرا
حتى مساست الهضرة
تراجل غناهاللمحبة
وصار الكره شيخ طبّاع
******************
ڭولوا آش طرى
حتى عاد الحرف
عيارو دهب ونقرة
ف سوق النحاس
بالكساد ك يتباع
*****************
ڭولوا اش طرى
حتى عاد العرف
موس راصد بڭرة
زادها تنغاس
وف لوزيعة توزاع
******************
ڭولوا..واهيا سيادي
راه دعوة النص هاذي
الله يجعل عرڭ
هذ لقيصدة
تقليد على اللي
فرّق لحصيدة
على بومارث
وخماس ورباع

شاهد أيضاً

تطبيق تحدي المعرفة حمله مجانًا

        يحوي التطبيق على 12 تصنيفا الأدب العربي اللغة العربية التاريخ صدر …

أم على قلوب أقفالها – محمد فتحي المقداد

  مع بداية انطلاق حياتي العمليّة في العام ١٩٨١، انقطعتُ عن الدراسة في الصفّ الحادي …

هل أعجبك ما قرأت ؟!

%d مدونون معجبون بهذه: