الرئيسية / الزجل / حصريا على ذي المجاز .التروبادور لعزيز بنسعد

حصريا على ذي المجاز .التروبادور لعزيز بنسعد

 

 

التروبادور

 

باش نقطع أنايا مواج هاذ لبحر

يامس كان لمجاج وبنيت قصيدة

صام لكلام وبمداد الحرف تسحر

ما فطر حتى سلمت لينا لحصيدة

وشهدت بلسان الحق الله اكبر

وكون ما قناو للطير الحر مصيدة

ڭاع ما يكون الشاهد فينا ، شاهد قبر .

منين نجيب أنا للفجر

تشامير على ڭد النور

منين نجيب للظهُرْ

فرجية باش يخرج يدور ..؟

 

منين نجيب انا للعصر

جَبَدُورْ على ڭد السطور

يشرب مدادو ويعصر

في فم المُغْرُبْ الديجور .

 

حلفت الأرض بالطوب ولحجر

ما تشرب دم المغدور

خرفت وقجَّرْ السيف على خنجر

واحد جار ولاخر مجرور

 

ليلتها نصلت العدة على ضو لفجر

دوزت بيها حق الله وخرجت تزور

ترش في ڭللالما تطفي في الجمر

ينزل رحمة ونور على شاهد لقبور .

 

بالسيف كان خيط لمحبة رهيف

وطاحت لبرا في نوادر التبن ..

جابت سبة على سحاب الصيف

لكح وسكح بوحدو قميم اللبن

بالحلوف هاذي منازل لخريف

الشتا مثلجة وجا الصر معربن .

 

الوقت وذَّنْ وبقات الصابا بلا حصاد

تخاصم السبول مع لمطامر وترهبن مط وغمار الݣمح المدروس .

السروت ملطة وبطا عليها القصاد

ما رݣم كلام ما شاف علاّم يتغبن بلا تماك لا طراشح لا قربوس

سلاك الفرح تهرنن كلها فين صاد

وبقى النقش البلدي في سقف الجيران بين قواسهم مغروس .

 

نوادر مقربسة بالرماد ..

نتسنى غ يتحرك الريح

وندريها في وجه لعناد .

 

تدمع العين بالدم تسيح

شافت الحافة حڭاوالواد !

عاد طلقت رجليها للريح .

 

تجري وتطيح ودركتها الحملة

ما بانت دوبانت* ما فكت وحلة

خلاص مللي عمات الذبانة وحلة

قصدت لخلا وبقات حوايج عبلة

في سلك النشير بلا قرارص .

 

بقى عنتر في جلايلو يعثر ..

نبلة في الصدر ..

والحربة ترشݣت في الظهر

واش جا ما وصلو للبحر  !!

 

قيس يسايس في ليلى وترامى فالغيس

ونزل للترعة ملط يعوم

ما تكايس سمح فاللاما وتعامى بالفاقيس

لابس شنعةْ ثوب المظلوم .

 

سمح في سلهام لكلام وهام كالروايس

معاني بالعرام وطاح السوم

كِالعرود عياب الصلاة ، كِ بوبرايص

بجوج خانو العهد كمرسوم .

 

شمل ملموم وتفرق اليوم

كان مقسوم على ربعين ولا طالب تكايس

ما خلاو لا شارب لا قمقوم .

وشوف المغروم ببلاد الروم فدمو غايس .

 

نسلو هذب الخنساء بالدموع

دموع كالعڭيڭ تتبارك على خذوذ الورد

طابو لشفار والخاطر مفݣوع

شموع تݣدي لمسا والليل ڭسا عليها وبرد .

 

تحط الراس ع الصخر يطوع

تتهجى المكتوب تحلف لمعاني  تقراها ضد

تبكي وتتسراح برجا مڭطوع

تندب الوعد مڭواها هي اللي ما عندها سعد  .

 

متاومة لجروح وما ڭالت آح لهاذ الروح

تسحلات بكاها خلات سر العين مفضوح

تعرض ف لواح البعد تفسر ف المشروح

غلبت طروح هي واليوم بالكية فين يروح .

 

حرزو اهلي ، حازو نخلي، هزو التمر ولبلوح

ولوح حملي، شتت شملي ،يكزو عربنا وشلوح

كتبو ف اللوح الروح وحدة وانا وحدي مݣروح

 

فقنا للسحور شربنا لغوات على الريق

ابنادم مذعور الروم نوات اخويا طارق ..

 

ما جا كل واحد يبني عشة ..

حتى تڭرض المنجل في يديه

ما عرف يدير به محشة ..

بقى السبول حرش ..

بقى الشجر معرش ..

بقى لحكام بلا عرش ..

 

 

كانت هاذي بلاد جدي والواليد ..

كون ما لبحر والحال بعيد ..

كون ما الحر نحرك ليها ونزيد ..

 

نزيد التبن علْ لوڭيد

ونقرع ف كلشي لوقيد ..

انا كنشوط في راس التاريخ ..

وهو كيفرنس ..

وانا حالف ما نتعاتق مع هاذ لمفلس

ي يحل عويناتو .. ي ناكل ليه وذيناتو .

 

  • سرعان ما وفدت إلى الأندلس البعوث ، من سائر بلاد أوروبا فعلى سبيل المثال، فلقد أرسل جورج الثاني ملك الإنجليز بابنة أخيه الأميرة (دوبانت)
  • تروبادور هو شاعر أو موسيقي عاش في القرون الوسطى، في الجنوب الشرقي لفرنسا وسرقسطة في مملكة أراغون وضواحيها بالخصوص. أصل هذا النوع الموسيقي هو أندلسي، اسم الكلمة مشتق من طرب وكلمة دور. وكانوا يعزفون الموسيقى متنقلين بين القصور .

هل أعجبك ما قرأت ؟!

%d مدونون معجبون بهذه: